Irene Echeverrik, Espainiako Europa Cinemas programako arduradunak, Zineuskadiko bulegoak bisitatu ditu Euskadiko zinema aretoekin biltzeko asmotan. Jardunaldi horretan Europa Cinemas sarera sartzeak zehatz-mehatz zein onura eta konpromiso dituen azaldu da.
Europa Cinemas Europako zinemarekin konpromisoa duen zinema aretoen sarea da. Publikoen berrikuntza eta Europa zein nazio mailan ekintza ezberdinak aurrera eramanaz, ikus-entzuleekin komunikatzeko praktika berritzaileak sustatu eta partekatu nahi ditu.
Jardunaldian dozena bat zinema aretok baino gehiagok parte hartu dute. Hiru ordutan sare horretako kide izateak dituen abantailen inguruko informazioa jaso da, zein konpromiso hartu behar dituzten argitu da eta 2015. urtean zinema aretoen sareak utzitako datu esanguratsuenen berri eman da.